ARVEN ETTER AGNES

Arven etter Agnes - ein hyllest!

Agnes Buen Garnås gjekk ut av tida i november 2024, og folkemusikken miste med det ein av sine mest sentrale kvedarar, både som utøvar, pedagog og kjelde.

Det er ein enorm mengde kvedarar og musikarar som har henta lærdom og inspirasjon, eller på anna vis nytta godt av Agnes sitt virke og kunstnarliv. Det vera seg på kurs og samlingar, gjennom opptak eller på vitjing heime hjå Agnes og mannen Per i Breskelia. Som sentral i miljøet rundt Club 7 på 70-talet, var det ho som fekk fleire av dei fremste folkemusikarane inn i varmen der.

Agnes rakk å gjeva ut eller medverke på 18 plater før ho gjekk bort, der Draumkvedet frå 1984, som hausta Spellemannprisen, og Rosensfole (1989) med Jan Garbarek er blant dei mange høgdepunkta. Ho vann landskappleiken i kveding seks gonger, og mottok det som finst av prisar og utmerkingar for folkemusikarar, m.a. Kongens fortenestemedalje, Norsk Kulturråds Ærespris, Lindemanprisen, RFF-prisen, Sagprisen og Osaprisen. 

Me har i dette høvet samla representantar for familien samt eit utval av profilerte utøvarar av vokal folkemusikk som på ein eller annan måte har knytning til Agnes og musikken hennar. Det vil bli hardingfelespel, og sjølvsagt mykje kveding - både solistisk og saman med eit kompetent band under leiing av bøheringen Audun Rørmark.  

Vel møtt til ein kveld der me skal hylle, og minnast, Agnes Buen Garnås.

Ingvill Marit Buen Garnås - vokal

Magnhild Garnås Haugen - vokal

Per Anders Buen Garnås - hardingfele

Knut Buen - hardingfele

Kirsten Bråten Berg - vokal

Arve Moen Bergset - vokal

Kim Rysstad - vokal

Berit Opheim - vokal

Marit Karlberg - vokal

Audun Rørmark - bandleiar

foto: Knut Buen